FILE KEBERADAAN TAMBAK RAJA SILAHISABUNGAN

TONA NI ANGKA OMPUNTA NA PARJOLO I,
SITONGKA HALUPAHONONTON.-
-------------------------------------------------------------------------------------------------------

Parhorasan ma dihita sude !
Hamu sude akka napinarsangapan pinompar ni ompunta Raja Silahisabungan disandok ingananna be.-
Dison pinatorang taringot tu inganan “ Tambak” ni Ompunta Raja Silahisabungan, na pinatolhas ni angka amanta dohot ompungta naung parjolo i, songoni muse sian angka surat parningotan catatan sian notes ni ompunta na jadi fakta (bukti2). Jadi sude na tarsurat on, ndada na ni karang-karang, manang asal sesuai tu maksud ni roha sambing. Sitongka do situbuan na so adong, jadihonon na so adong. Nasintong do tona honon.
Husurat hami hatorangan on , ima mangoloi/manggohi pangidoan ni pomparan ni ompunta na di Jakarta, ima di “parpunguanni angka anggota presidium ni Pomparan ni Raja Silahisabungan”, na di patupa tanggal 14 Agustus 1978, di bagas ni amanta Brigadir Jenderal ARIFIN TAMBUNAN SH. Jalan Kwitang Timur No. 2 Jakarta.
Di pertemuan i rodo sungkun-sungkun ni donganta na di Jakarta songon on : “ Beha tahe bapa, bolus do paboaon muna tu hami fakta2 na di dolok Parmasan do tambak ni Ompunta Raja Silahisabungan”?
Ni alusan ma : “Mauliate ma hudok tu hamu, ala di sungkun hamu faktana, taringot tu Tambak ni Ompunta Raja Silahisabungan; jadi hata honon ma tu hamu di loloan on, nabinoto sian angka tona ni natua-tua na parjolo i, dohot sian angka catatan di notes nasida naung sahat tu iba”. Ninna St. Richard Tambunan gelar ompu Tumpal, mangalusi.-
Jadi di bagasan roha natoruk, hata honon ma tu hamu na dapot iba fakta paboa na di Dolok Parmasan Pangururan Samosir do tambak ni Ompunta Raja Silahisabungan.-
Di taon 1896, karejo do Raja Frederik Tambunan di kantor ni Controleur Van Samosir di Pangururan, jala ia ompungon, ima sian huta Parbagasan Lumban Pea. Natoras ni Patuan Sada Tambunan na hinan. Di taon 1917 monang verkising do ompungon di Lumban Pea, gabe Kepala Kampung di Huta Parbagasan.-
Di Pangururan, godang do Raja Frederik on marhubungan dohot angka Raja2 Ihutan, Raja Padua dohot panungganei ni Pulo Samosir, sian Silalahi nabolak, Paropo d.n.a. Ala sai ro do angka Raja2 i tu kantor ni Controleur, partoru mai sahali saminggu di ari onan na i toho.-
Apala ale-ale ni Raja Frederik on, na intiem i ma Raja Ihutan Ompu Raja Hennes, na sian Silalahi nabolak, dohot Raja II Salomo. Alana Tarombo ni si Tuan Silahisabungan na pi natorang ni Raja Ihutan on, tar catat do di notes ni Raja Frederik na tartanggal 16-12-1896.-
Di taon 1898, Borhat ma 3 (tolu) solu bolon sian angka tunggane pinompar ni Tambun Holing, ima sian pinompar ni Datu Gontam, Parsingate, Puraja Baruara, Patuan Pagaraji, Puraja Ujung Sunge . Borhat tu Pangururan, lao tu Dolok Parmasan, ziarah / mangebati tambak ni Ompunta Raja Silahisabungan, ima dung tangkas diboto nasida disi tambak ni ompunta na sangap parsadaan ompu pamopar di hita,-
Di taon 1908, rodo pinomparni Tambun Marbun laho mamereng natorasna di hutagalom (tidak terbaca), gabe habornginan di Lumpan Pea. Jadi marborngin ma tu jabu rura na umbalga di Lumban Tonga2, di jabu ni Ompu si Gansi (tulisan nama agak kabur).
Di dok tamuena ima tu ompu Si Gansi: Hahang-doli! Bolas do hami di jabumuna on marborngin? Na ha bornginan do hami lao tu hutagalom(tidak terbaca), marnida inanta disi”!
Alus ni O. si Gansi : “Ba hea do so bolas”! Jala diigil roha do asa patorangon muna jolo, boasa pintor hahangdolimuna ahu”?
Di patorang tamuena I ma : “ Hami na pinompar ni Tambun Marbun, anggini Tambun Mulia, na bungkas sian tano Sibisa borngin-borngin. Marsipaboa tu anakhonna be do barita nami, ima barita ni Tambun Marbun na lintun sian tano Sibisa.-

Ditingki marsahit Ompunta Siraja Tambun, di jou ma angka anakna, ima: Tambun Mulia, Tambun Saribu dohot Tambun Marbun. Di dokma tu angka ankna i : molo mate ahu alani sahit hon, ba ingkon peakhononmuna do bangkengku tu Dolok Parmasan tu lambung ni damang Silahisabungan. Jala ingkon janjihonon muna do i begeonhu asa sonang rohangku”.-
Jadi sude nasida manguarihon(sulit terbaca) jala mangundukhon, molo tung so tarbaen disi matua amanta-nasida i di bandahon tu Dolok Parmasan, ba ianggo saring-saring na ingkon boanon nasida do tu lambung ni Ompungnasida di Dolok Parmasan.-
Matema Siraja Tambun, jala dibandahon di tano Sibisa, Alana dang tarpatupa nasida biaya mamboan tu Samosir (Dolok Parmasan).-
Dung manang piga2 taon, sai dipangido Tambun Marbun ma tu hahana i asa diboan nasida saring-saring ni amanasida i tu lambung ni ompung nasida di Dolok Parmasan, alai didok angka hahana i ma mangalusi: dang bolas da anggia songon na mangkali hirik mangongkal holi-holi ni natua-tua, ingkon pantomon do horbo, jouon raja2 ni bius, paluon ogung sabangunan. Jadi jolo martumburma dabu-dabunta asa bolas ta patupa tona ni amanta i”.-
Manang piga-piga hali didok Tambun Marbun asa dipasaut nasida tona ni natoras nasida i, naung di uarion di tingki ngolu ni Siraja Tambun, alai sai songoni do alusni hahana i . pola didok mangalusi angka hahana i : “ ba tumagon do bius jouon sian hata ni amaniba oloan? Ba tadok hian ma nian tu amanta tingki di ngoluna, jolo mamora ma hami, asa huoloi hami hatami “! Hape so adong hatanta mandok songoni. Ia tung matua tano on do so adong horbo, so adong ogung, ba dang saut be tona ni ama niba naung diundukhon i patupaon?.-
Dang adong be hasonangan di rohani Tambun Marbun,. Putus ma dirohana ingkon gabe lao ma ibana sian Sibisa, jala angka turunanna laho ma deba tu dolok sanggul gabe marmargahon “Marbun” manang na gabe marsada marga dohot marga Marbun, asa bolas martano disi. Alai nahira sude do pinompar ni Tambun Marbun umboto tarombona naturunan ni Raja Silahisabungan nasian Siraja Tambun , denggan ma mulak manuk tu nunutna (tulisan samar).-
on ma di baritahon pinomparni Tambun Marbun naung mar-margahon Marbun sian bakkara.-
Laos borngin panghataion nasida i , tiur haroan ni inanta boru Sibarani ni alap ni ompu si Gansi parjabu i, na sorang i baoa.-

Didok tamuenaima tu Ompu ni si gansi : Boha hahang! Ala nunga asi rohani Debata Mulajadi di hita toho ro iba anggi dolim tu jabu mon, tubu anakta si ussok, sai simbur-simbur magodang ma ibana tu jolo on,………………..(tidak terbaca) . adong pangidoanhu tu ho hahang dohot tu angkang boru! Asa nai ingotonmu adong anggi-dolim na lilu, ima hami pinompar ni Tambun Marbun, ba bahen ma goar ni anakta na baru sorang on si “Marbun” . Molo di jou hamu goarna i, nai ingot hamu ma hami pinomparni Tambun Marbun ba bahen ma goar ni anakta na baru sorang on, si “Marbun”.-
Alus ni ompungni si Gansi! “ Ba denggan anggia, asa gabe parningotan tutu di hami hahamuna, si Marbun ma goarni anakta i. sai horas ma ibana mamboan goarna i”. Ianggo na hinan, sai di bahen natorasna do margoar marsarat gellengna, molo toho adong na porlu ingoton ditingki parsorang ni na sorang i.-
Jadi saut ma si Marbun goar ni anak ni ompu si Gansi, jala dina tardidi di tambai ma goarna tardidi : “ Marbun Samuel”
Gabe halak na sangap jala marhuaso do muse amanta on, Si Marbun Samuel Tambunan on ma na gabe KETUA DEWAN ni sude Nagari Tambunan Tapanuli Utara. Jala sahat tu tingki on (9 November 1978) mangolu dope amanta on. Amanta Marbun Samuel Tambunan on do ketua Panitia Besar Panjaloon di haroro ni hahadoli di taon 1964. Sai anggiat ma saur matua jala hipas2 amanta Marbun Samuel Tambunan on tu joloan on. Si torop ginompar angka na burju roha, na ingot di tona, adapt dohot uhum.

Haroro ni anggi doli sian pinompar ni Tambun Marbun tu jabu ni Ompu si Gansi sai di paboa do i tu angka natua-tua dongan na mangkatai, jala borat do di pingkiri natua-tua i, beha dalan laho paandarhon (sulit terbaca) jala paulakhon (parasmihon mulak) dongan tubunta on, ia so marhite sian na papestahon tambak ni ompunta di dolok Parmasan.-

Marudut ma muse disiala i di taon 1928, lao do angka panungganei ni Lumpan Pea tu Dolok Parmasan, masihol naeng ma mereng Tambak ni Ompuntai, alai dang pola sian rapot halalao nasida i, jala dang pola, mambahen acara nabalga, holan martangiang sambing do nasida di Tambak i (upacara na met-met).

Di taon 1936, jolo marrapot ma muse sude panungganei di ginompar ni Siraja Tambun na ni ketua-an ni Raja ALEXANDER TAMBUNAN asa lao angka panungganei ni donganan ni musik sarune, ………..(Tidak terbaca) Tambunan, laho mangirihit Tambak ni Ompunta Raja Silahisabungan di Dolok Parmasan. Di toho i do borhat manogot ni ari Minggu, asa jolo marminggu di Pangururan. Jadi tung songon Pesta Bolon do di Pangururan di ari i, Alana di luluhon musik do sude parminggu i, dohot angka na ro mar minggu hian, laos marnatampak do mangihuthon rombongan i tu dolok Parmasan. Sian tot ni dolok Parmasan i sude mamboan sada be batuna tarboansa be, dohot rihit sian sunge na metmet na di toru ni dolok i . musiki na ni uluhon ni Guru Adian Silalahi, di tingki i guru di Tambunan. Parpudi pindah tu Jakarta do amanta on.
Sude ma rombongan i, mangirihit, paiashon tambak ni Ompunta Raja Silahisabungan, jala di panpeakkon be ma batu hu maliang tambak i, ipe asa di mulai acara mangirihiti tambak..-
Mandok hata parjolo sian Tambunan ima Raja Alexander Tambunan, paboahon maksud apala parjolo dohot tujuan haroro nasida lao mangirihit tambak ni Ompunta Raja Silahisabungan, dungi mandok hata sian mar ompu-ompu jala mar-marga2 pomparan ni Raja Silahisabungan, mandok hata boru, i ma guru Henderik Siagian sian Lumban Gaol, raja no ro di tingki i. Jala paampuhon ma hula-hula ginompar ni Raja Naiambaton, paampuhon tu Tambunan. Mulak ma sude rombongan i, tu huta Silalahi di Pangururan marsipanganon. Mardalan do angka jambar na margoar di tingki i.-

Di taon 1947, tingki martiga-tiga Abdul Malik Tambunan (amanta on margoar do Ompu si Anjur) tu Pangururan dohot tu Panomboan. Marsihohot do rohana, jala masihol situtu do ibana naeng ma mereng tambak ni Raja i Silahisabungan di Dolok Parmasan. Ala so dohot ibana na di taon 1936 tu dolok Parmasan mangirihiti. Didokhon ma hahadoli Silalahi sian huta Silalahi Pangururan patudu hon Tambak i : “ Tung patuduhon jolo hahang doli Tambak ni ompuntai asa sian tala na di lambungna i ahu mambuat air sombahyang, jala ingin au sembahyang……….(tdk terbaca) di tambak i.-

Nunga diboto Ompu si Anjur hian na adong tala di lambung ni tambak i (mangihuthon pinaboa ni na dohot di taon 1936 mangirihiti). Jala tondong do idaon Tambak i tu Pusuk Buhit, jala tatapon tu Paropo- Silalahi Nabolak, dompak Sibisa dohot tu Tolping, songonima di hatahon naung mamereng.-
Saut ma nasida laho tu dolok parmasan, jala sembahyang.-

Dung sidung sembahyang, di berengima panasapan di lambung ni tambak i, ba di sungkun manang ise manasapi i, jala ujungna di boto ma marga Sitanggang sian huta sitangko babi, na jonok tu dolok Parmasan i .-

Di minggu berikutna, laho ma muse Abdul Malik Tambunan (ompu si Anjur) dohot donganna 2 halak nari sian Tambunan Lumban Pea, ima si Domitian Tambunan dohot Manarak Tambunan, mangaluhon Sitanggang na manasapi Tambak i, tu Tentera ni si Bejo (di tahun 1947) di Pangururan, jala torus ditangkup Sitanggang i, huhut di paresoma na sinasapanna i.-

Dungi dung tartangkap Sitanggang i, roma tangis-tangis inang ni Sitanggang on, borunta boru Silalahi na ma nubuhonsa.-
“Among! Asima roham di ahu , dohot dib ere muna i, tung hamu ma among manguhum bere mu i, borat bahen hamuna, asalma unang tentera i pamatehon” ninna borunta i ma tu Abd. Malik Tambunan, Domitian dohot Manarak.-

Ujungna di putushon tentera ima asa di padame di huta, gabe di putushon raja2 ma di huta Silalahi, napurananna sude raja-raja bius na disi, jala sude di huta i keluarga turunan Silalahi raja dohot ginompar ni Siraja Tambun, laos songoni sude marga2 gomparan ni Silahisabungan na di huta i. Jala garar on na hepeng Rp. 30.000,- huhut ingkon ibana ma manjaga tambak i unang hona gosi-gosi. Laos di suan Abd. Malik ma sada hau pangkuala di lambung tambak i.-
Laos di taon 1947 i do marrapot pangituai ni Tambunan sian Lumban Pea, Lbn Gaol, Baruara, Tuan Pagaraji, Sunge dohot sian boru di ampuan, marsada ni roha laho mambangun tambak i . dipillit ma panitia tambak ni Raja Silahisabungan di Dolok Parmasan, asa hatop so hariboriboan tambak i, Alana dang sai tarula parkara songon na salpu i.-
Susunan ni panitia Tambak ni Raja Silahisabungan di Dolok Parmasan di taon 1947, i ma :
Ketua : Abdul Malik – Omp.Si Anjur Tambunan Sian Lumban Pea
S. Usaha : Raja Epharaen sian Baruara Aek Raja
Bendahara : Gr. Frederik Lbn. Gaol sian Buntu Raja
Komisari2 : Sada halak sian ganup horja pinompar ni Raja Silahisabungan,Songon i sada be di ganup inganan pangarantoan.
Jadi dung mulai mangula panitia on di baen angka rapot di sude inganan ni pinompar ni Raja Silahisabungan , dapot ma keputusan taringot tu guguan tu tambak i, i ma :
I. Nasa batu dohot rihit tu tambak i , sian pomparan ni Raja Silahisabungan na di Pulo Samosir dohot na humalian.-
II. Nasa boras na ringkot tu pesta , nasian pomparan ni Raja Silahisabungan na di Toba Holbung.-
III. Nasa simin naporlu tu tambak i , sian gomparan ni Raja Silahisabungan na di Tapanuli Selatan sahat tu Sumatera Barat.-
IV. Nasa hepeng upah tukang , horbo dohot sude biaya2 tu pestana , asing ni naung rade diginjang i sian gombaran ni Raja Silahisabungan na di Sumatera Timur dohot na di Jawa ma.-
Torop dope sian angka amanta na ginoaran di ginjang i mangolu nuaeng, jala molo pe naung ….. matua, hira sude do gomparanna (anakna/pahompuna umboto na hinatahon di ginjang i.-
Alai marisuang do ulaon ni panitia i, Alana dung di taon 1948 masuk ma tentera Belanda dohot Sekutu tu Tapanuli/Samosir/Toba, mambaen putus hubungan, jala margurilla ma sahat tu taon 1950. mardomu muse tu tingki na mangihut na terjadi peristiwa2 di Lbn Pea sandiri na gabe urusan ni Abd. Malik sahat tu tingkat Propinsi , ima parbadaan ni angka naposo. Marudut pembrontakan/porang saudara.-
Sinuratho sude angka nadi ginjang i napinapungu-pungu hatorangan ni angka natua-tua na mangolu dope nuaeng , ima angka ni ulahon nasida dohot jinalona tona sian angka ompu angka naparjolo i.
Lumobi mai sian tona ni angka natua-tua pomparan ni Siraja Tambun.-
Marondolan di ginjang ima gabe manghajongjonghon na di dolok Parmasan do tambak ni Ompunta Raja Silahisabungan.
Horas jala gabe.-

DITOLOPI HASINTONGAN NI HATA
NA TARSURAT DI GINJANG I

pelindung Ketua Sekretaris

(Abd. Malik Tambunan) (st. R. Tambunan) (st. W. Silalahi)


Catatan :

-Diketik ulang sesui dgn asli
-Ada beberapa tulisan (tidak terbaca) karena file sudah lapuk alias tdk terawat.
-Jika ada yang mau diterjemahkan ke bahasa Indonesia silahkan buat permintaan kepada penulis.

Jakarta 25 November 2009

Diketik ulang oleh :

Biarjo Joseph Silalahi
ParPintusona/Samosir